Aksioni i gushtit: Inspektori i tatimeve kap "biznesmenin" duke shitur misër të pjekur pa kupon tatimor
Operacioni i koduar "Sfungjeri" zbulon një rrjet shitësish ambulantë që vepronin pa kasë fiskale.
Një aksion masiv i drejtorisë së tatimeve ka trazuar plazhet e bregdetit ditët e fundit, ku shumë inspektorë kanë zbritur nëpër plazhe të maskuar si pushues të zakonshëm me rroba plazhi, kapela kashte dhe me vaj ulliri të "shtetëzuar" (marrë me dhunë me pak fjalë një shitësi në Laprakë gjatë aksionit të suksesshëm "Pitja").
Rezultati i ditës së parë ishte një sukses i jashtëzakonshëm: u kap në flagrancë një shitës që po tregtonte misra të pjekur pa lëshuar kupon fiskal.
"Nuk mund të lejojmë informalitetin të dëmtojë ekonominë e vendit," deklaroi drejtuesi i operacionit për redaksinë tonë nga hija e një çadre. "Inspektori ynë priti dy orë në diell duke u shtirur sikur po bënte plazh, pastaj shkoi për të blerë një misër dhe vuri re se shitësi nuk kishte kasë fiskale."
Grupi prej 7 inspektorësh, dieta e karburanti i shpenzuar u quajt i arritur pasi vuajtja e inspektorëve nën diellin e fortë të ketyre diteve të ngrohta u shpërblye. Djemtë e shezlongëve përbri vazhdonin t'iu merrnin paratë pushuesve pa kupon, por tashmë inspektorët e kishin kryer misionin e tyre: krimi ekonomik u asgjësua plotësisht.
Shitësit iu konfiskua karroca e misrave, ndërsa tatimet njoftuan se hapi i radhës do të jetë kontrolli i shapkave që shiten buzë detit për të parë nëse plotësojnë standardet e Bashkimit Evropian.